أمـــواج

ثلاثة تسبب الإحباط : الواسطة..و الديون..والمنتخب .

ثلاثة صعب نتخلى عنها : الماء..والهواء..والبازين .

ثلاثة محتاجات واسطة : البعثات..والشقق..ورقاية النخل .

ثلاثة يرفعوا الضغط : الملح..وزحمة المرور..والعيل كان عشش .

ثلاثة تسبب الغرور : الفيلا.. والهامر..وبدلة الحرس البلدي .

ثلاثة ياكلوا في لحوم البشر: الحيوانات المفترسة..والبزناسة الكبار..وجماعة القرمة .

ثلاثة لازم نتخلى عليهم : التفنيص.. والبوزات..واللُّـقني وقت العمل.

ثلاثة ما يرقدوش الليل : المديون.. والخانب.. وواحد نايضة عليه السوسة .

ثلاثة شبه اختفوا من ليبيا : الهاتف الحراري.. واحترام الشيابين..والفراشية .

ثلاثة ما تحسش بطعمتهم الا في ليبيا : امبكبة على الحطب..وبورديم..وشاهي العالة .

ثلاثة تدعو لهم بالهداية : البلعوط ..والمحسدي.. والخنايسي .

ثلاثة ما تستغربش منهم في ليبيا : واحد قاص السريع على رجليه.. وواحد يسوق في الاتجاه العكسي ..وواحد طالع في الاحمر.

ثلاثة كان مشوا تتمنى ما عادش يولوا : الفقر ..والمرض.. والبنت كان تزوجت .

ثلاثة تتمنى ما تصبحش فيهم : سواق افيكو مستعجل..وطابور طويل في الشيل.. ومدير متعارك مع مرته.

ثلاثة ربي يفكك منهم : مجاري مفتوحة..وكلب مطلوق..ورشادة طايشة .

ثلاثة ما ليهمش معنى إلا في ليبيا : العسلوز.. والزميطة.. والعصبان .

ثلاثة لا تستخدم إلا في ليبيا : الحمّاس..والكانون..والمغرف .

________________

* الفكرة لأحد الأصدقاء الكتّاب وقد قمت بكتابتها اعتماداً على مشاهداتي وخبرتي كليبي .